தனியார் பள்ளிகளில் 25 சதவீத ஒதுக்கீடு: மே 18ல் விண்ணப்ப பதிவு நிறைவு

தனியார் பள்ளிகளில், 25 சதவீத இட ஒதுக்கீட்டில், குழந்தைகளை சேர்ப்பதற்கான விண்ணப்ப பதிவு, மே, 18ல் நிறைவடைகிறது. இதுகுறித்து, சேலம் மாவட்ட முதன்மைக்கல்வி அலுவலர் து.கணேஷ்மூர்த்தி வெளியிட்டுள்ள அறிக்கை: சிறுபான்மையற்ற தனியார் சுயநிதி பள்ளிகளில், தொடக்க நிலை வகுப்புகளில் உள்ள மொத்த இடங்கள், 25 சதவீத இடங்கள் ஆகிய விபரங்கள், இணையதளத்தில் வெளியிடப்பட்டுள்ளன. இதற்கான விண்ணப்பங்கள், கடந்த, 20 முதல், ஆன்லைனில் பதிவு செய்யப்படுகிறது. விண்ணப்பிக்கும் பள்ளி, குழந்தையின் இருப்பிடத்திலிருந்து, 1 கி.மீ., தொலைவுக்குள் இருக்க வேண்டும். விண்ணப்பிக்க, அனைத்து வட்டார வள மையங்கள், வட்டார கல்வி, மாவட்ட கல்வி, முதன்மை கல்வி அலுவலகங்களில், ஏற்பாடுகள் செய்யப்பட்டுள்ளன. மே, 18 வரை மட்டும் விண்ணப்பிக்க முடியும் என்பதால், மக்கள் பயன்படுத்திக்கொள்ள வேண்டும். இவ்வாறு அதில் தெரிவித்துள்ளார்.